Taliban sorkarin China beihna atan Afghanistan ram hman remti lo

Afghanistan-a rorellai, Taliban sorkar chuan China nena security field lama thawhdunna ṭha neih an duh thu sawiin, Afghanistan leilung chu eng pawl tan pawh China tih natna leh beihna tura hman an remti dawn lo tih an sawi.

Afghanistan acting foreign minister Amir Khan Muttaqi chuan Beijing-a China foreign minister, Wang yi nena meeting a neihnaah he thu hi a sawi. Nilaini khan Beijing-ah hian China, Afghanistan leh Pakistan foreign minister-ten meeting an nei a ni. Meeting zawhah Muttaqi hian a hranin China Foreign Minister hi a hmu leh a, Afghanistan leh China thawh dunna chungchangte an sawi dun.

Kum 2021-a Afghanistan civil sorkar thuneihna hnehchhuhtu, Taliban sorkar hi khawthlang ram tam zawk chuan an la pawm lo. Hetih lai hian China chu Aghanistan nena an inlaichinna neihte thlak danglam a, palai intirhtawn neihpuitu ram tlemte zingah a la tel a ni.

Muttaqi chuan Aghanistan-a Taliban sorkar chuan China nena an inṭhianṭhatna chu a ngaihlu a, foreign policy-ah pawh China chu an dah pawimawh hle tih Wang a hrilh. China-in one-China principle a kalpui chu a thlawp zel dawn a, China inrelbawlnaa ram dang inrawlh pawh a dodal tlat dawn tih a sawi.