Wuhan-a hri vang thi zat Report hmasa aiin 50% dawnin tam
Covid-10 hri hmuhchhuah ṭanna, China-a Wuhan City-a he hri vanga thi zat, city government-in report a tihchhuah tharah record hmasa aiin 50% dawnin an tam.
Nimin khan city government hian social media-a khawpui chhunga hri vanga thi zat hi a hmaa lo tarlan tawh ain 1,290-in an tam zawk tih sawiin, he khawpuia hri vanga thi hi an vaiin 3,869 an tling ta a ni. China ram puma hri vanga thi pawh 4,632-ah a kai phah bawk.
Wuhan-a hri kai zat pawh 325-in an tam zawk tih sawiin, hri kai zawng zawng hi 50,333 an tling tih sorkar chuan a tarlang.
Ram hrang hrangte chuan China chu an rama hri kai leh hri vanga thi zat a tarlan chungchangah langtlang lo leh rintlak tawk loah an lo puh fo tawh a ni. US president Donald Trump chuan hri leng chungchanga China report chu a ring tawk lo tih a lo sawi tawh a, hemi hnu hian Britain leh France pawhin Trump hian an rawn thlawp zui a ni. Britain prime minister Boris Johnson a dam loh chhunga ai a lo awhtu, Britain Foreign Secretary Dominic Raab chuan China tan zawhna khirhkhan tak tak an la nei tih a sawi a, France president Emmanuel Marcon pawhin hri leng dona kawnga China chetdan a ṭha tawk hle nia lo ngaih ngawt chu thil dik lo a ni tiin, midangte hriat loh thil thleng a awm ngei a ni, a ti bawk. Mahse Russia president Vladimir Putin chuan China thlavang a hauhsak thung a, China hmel tihchhiat tumna an beihna mai niin a puh let a ni.
Nimina report ennawn chungchangah rorellai, Communist Party chuan ramdangte nawr leh thawm neih vanga ti a nih loh thu a sawi thung. Wuhan Municipal Headquarters for COVID-19 Epidemic Prevention and Control chuan, damlo ṭhenkhat chu damdawi-inah enkawl loin mahni inah an thi a, hengte hi a tirah hriat theih vek a nih loh avangin report hi a danglam phah niin a sawi.