Denmark-in pension kum ti sang dawn

Denmark Parliament chuan pension kum tih sanna tur bill a pass a, kum 2040-ah chuan official pension kum hi kum 70 a ni dawn. Europe ram zingah a sang ber a ni ang.

Kum 2006 aṭang khan Denmark hian official retirement age hi kum nga danah ennawn ṭhin a ni. Tunah hian kum 67 chu pension kum atan hman mek niin, kum 2030-ah 68-ah ti sangin 2035-ah 69 a ni ang. Kum 2040-ah chuan kum 70 a ni tawh dawn a ni. Pension kum tih sanna tur bill ngaihtuahnaah hian a thlawp lamah vote 81 tlain, a duh lo lamah vote 21 a tla bawk.

Prime minister Mette Frederiksen, Social Democrats hruaitu chuan automatic-a pension kum tih san ṭhin chu ngaihtuah ṭhat a ngai tih a sawi. Retirement policy hi pawl hrang hrang pawhin an sawisel a, trade union huaihawtin Copenhagen-ah pawh lungawi lohna lantir a ni. A bikin kut hna thawktute tan tih san zel hi a ṭha lo tih an sawi. Denmark-ah hian mihring dam rei zawng hi chawhrualin kum 81.7 a ni mek a ni.

Europe ramten pension kum an siam hi a in ang lo thluah hlawm a, tun hnaiah ram eng emaw zat chuan an ti sang a ni. Sweden-ah kum 63, UK-ah 66, Italy-ah 67 a ni mek a, France chuan 2023 khan pension kum 62 aṭangin 64-a tih sanna tur dan a lo pass tawh bawk.