Gaza-ah chhawmdawlna phurtu UN truck 90 luh belh
Israel-in Gaza Strip-a chhawmdawlna thawn luh a phalsak aṭanga ni thum hnuah, Ningani khan mipui mamawh phurtu UN truck 90 chuang an tlan lut tawh.
Truck-ah hian chhangphut, naute chaw bakah damdawi lamte phurh niin, Nilaini zan khan Kerem crossing kaltlangin an lut a, mipui hnena sem chhuah turin warehouse-ah dah an ni. Ningani khan chhang siamna hmun hrang hrangah chhangthawpte an siam ṭan bawk. Israel chuan Kerem crossing kaltlang hian Nilaini khan truck 100 luh phalsak an nih thu a sawi a, mahse UN chuan hei hi mipuite mamawh phuhruk nan a la tawk lo hle tih an sawi. Indona thlen hma khan nitin Gaza-ah hian mipui mamawh phurtu truck 500 vel thawn luh a ni ṭhin, an ti.
Israel leh Hamas nen thla hnih inkahhai an puan a tawp hnuah, March 2 aṭang khan Israel chuan Gaza Strip luhnate hi dangin, ei tur leh mamawh dang pawh a dang chat vek a ni. Gaza-a chengten ei tur an tlachham a, rilṭamin mi tam tak an thi mai dawn nia ram leh pawl hrang hrangten an nawr hnuah, Israel chuan mamawh zualpui thawn luh hi a phalsak a ni. Gaza Strip an dan chhan hi Hamas in an mi hren mekte an chhuah theihna tura nawrna a nih thu sawiin, hei bakah ei tur tlachham tawh anga sawi chu a dik tawk lo a, Hamas chuan ei tur thawn luhte chu pawtpengin an lo ru ṭhin niin a sawi bawk.
Gaza Strip-a chhawmdawlna thawn luh leh sem dan turah Isarel leh US chuan America company-te kaltlangin ruahmanna siam an tum tih Israel prime minister Benjamin Netanyahu chuan a sawi. Mahse UN leh agency dangte chuan US-Israel ruahmanna siamah hian an tel ve dawn loh thu an sawi thung.
UN humanitarian chief thusawi sawifiah
UN humanitarian chief Tom Fletcher-a'n darkar 48 chhunga chhawmdawlna an dawn hman loh chuan Gaza-a naute 14,000 an thi dawn tia a sawi chungchangah UN chuan na taka sawisel a tawk a, hei vang hian Fletcher thusawi pawh hi a sawifiah zui bawk.
UN Office for the Coordination of Humanitarian Affairs (UNOCHA) chuan Integrated Food Security Phase Classification (IPC) report-ah Gaza-ah naupang kum ruk hnuai lam zingah an taksa mamawh ang ei tur ṭha hmu pha lo April 2025 - March 2026 chhungin 14,1000 vel chu an awm dawn tih tarlan a ni ngei a, mahse hengte hi darkar 48 chhungin ei tur ṭha pek loh chuan an thi dawn nia tarlanna a awm lo tih a sawi. Ei tur ṭha leh chhawmdawlna hi a rang thei ang bera an dawn a ngai tih a sawi laiin, an thi mai dawn tih sawilanna a nei lo thung.