Texas state-in classroom tinah Thu Sawm Pek tar tir tum

US-a Texas state chuan an state chhunga sorkar school-a classroom tinah Thu Sawm pek tar tirna tura bill a siam chu Inrinni khan House-ah vote lak a ni a, House member tam zawkin an thlawp. Ni rei lote hnuah final vote lak a ni leh ang.

He rawtna hi Republican lam siam niin, Republican thunun House chuan a pawm sak a ni. Final vote lak a nih hnuah Governor Greg Abbott hnenah a pawmpui tura thawn a ni ang a, a hming a lo ziah hnan hnuah danah chantir a ni tawh ang.

Bill thlawptu zinga mi, Republican member Candy Noble chuan he bill hian an ram zirna leh dan hmanga rorelna kawnga hman aṭanga an ram tana thil pawimawh tarlan a tum a ni, a ti.

Texas bakah Louisiana leh Arkansas pawhin he dan hi an nei tawh a, mahse federal judge-in an ram danpui nena inmil lo tia a dansak avangin Louisiana-ah chuan hman a ni rih lo.

Texas lawmaker-te chuan zirlai naupang leh thawktuten school hour chhunga ṭawngṭai leh sakhaw lehkhabu thianghlim chhiarna hun an hmang duh a nih chuan school thuneituten hun an siamsak tur a ni tiin, hemi atana bill siam pawh an pass tawh bawk a, Governor Abbot chuan a sign thuai rin a ni.

School classroom-a Thu Sawm Pek tar chhuah tura rawtna hi sawiseltu tam tak an awm thung a, an zingah hian Kristian leh sakhaw dang hruaitute pawh an tel. Thu Sawm Pek tar chhuah leh ṭawngṭaina hun siamsak chuan sakhaw dang zalenna thlengin a nghawng thei dawn niin an sawi. Mahse bill thlawptu lam chuan Thu Sawm pek chu an ram judicial leh educational system innghahna lungphum a ni a, tar lan a ni ngei tur a ni, an ti thung.

Ten Commandments bill-ah hian public school-a classroom tinah chuan poster emaw, frame siamin emaw Thu Sawm Pek, English version kher chu 41-by-51 centimeter-a liana tar tura tih a ni.