Hamas-in hnathawkte hlawh pe ṭha thei lo

Gaza Strip-a rorellai, Hamas sorkar chuan sorkar hnathawkte bakah a military wing member-te hlawh a pe mumal thei lo a, din a nih aṭanga sum lama harsatna lian ber a tawk mek niin London-a inkhuar, Al Sharq Al Awsat newspaper report chuan a tarlang.

Al-Sharq Al-Awsat chuan Hamas mi leh sa ngei aṭanga thu an dawn danin, Hamas sorkar chuan thla li chhung khan thawktute hnenah shekel 900 (USD 240) vel chauh a pe chhuak a, thawktute pawh an lungawi lo hle tih a sawi.

Hamas military wing, al-Qassam brigade member-te pawhin thla thum chhung hlawh an la tawh lo a, an member thi chhungte bakah jail tang mek leh hliam tuarte pawhin sum engmah an dawng lo bawk.

Hamas nena indo mek, Israel chuan Hamas hruaitu lute a bitum avang leh, an hruaitu eng emaw zat tih hlum an ni tawh avangin Hamas inrelbawlna pawh a mumal tawh lo nia sawi a ni. Israel hian Hamas lakah beihpui a la thlak chhunzawm reng a, March 2 aṭang khan Gaza Strip luhka te dang vekin ei tur, damdawi leh mamawh dang thawn luh turte pawh a dangchat vek a ni. Mahse, ram hrang hrangte sawiselna leh, Gaza-a cheng Palestinian-te ei tur leh mamawh dangte an tlachham dawn tawh nia sawi a nih hnuah kar liam ta aṭang khan chhawmdawlna mamawh zualte thawn luh a phalsak leh ṭan a ni.