Gaza Humanitarian Foundation hotu a bang

Gaza Strip-a Israel ruahmanna hnuaia chhawmdawl hna thawk tura kumin February thlaa din, US sorkar thlawp Gaza Humanitarian Foundation executive director Jake Wood chu Pathianni khan a bang.

Jake Wood hian Gaza Humanitarian Foundation hotu dinhmun hi thla hnih a chelh hman a, mahse ruahmanna siamah an pawl hma lak dan tur chu a duh khawp lo a, thuneihna an nei dawn lo nia sawiin a ban thu hi a puang a ni.

Foundation pawhin Wood a bang chu pawi an tih thu thuchhuah siamin an tarlang a, mahse hemi avang hian Gaza-a chengte tana an hnathawh a bahlah phah dawn lo tih an sawi. "Kan truck-te pawh an inpeih tawh e," tiin nimin aṭang khan tlan lut tir an tum. Tun kar chhungin Palestinian mi maktaduai khat chuangte chhawmdawlna tur pek hman an tum a ni. A rang thei angin Gaza-a cheng zawng zawngte puihna tur pawh pek theih an beisei thu an tarlang bawk.

US State Department chuan Gaza Humanitarian Foundation in chhawmdawl hna a kalpui dan tur chu a thlawp chhunzawm zel tih a sawi. Hetih lai hian Israel, Palestinian leh UN official lam chuan sawi an la nei lo thung. UN hian Gaza Humanitarian Foundation hi a hmain a lo sawisel tawh a, Gaza-ah hna an thawhna tura UN hnuaia agency hrang hrangte chuan an thawhpui dawn lo niin a lo sawi tawh a ni.