Turkey-ah Pakistan PM a zin

Pakistan prime minister Shehbaz Sharif chu India nena boruak ṭha lo tak an neih mek laia an ram thlawptu, Turkey ramah ni hnih cham turin Pathianni khan a zin. A thlen ni hian Istanbul-ah Turkey president Tayyip Erdogan nen an inkawm nghal a ni.

PM Sharif leh President Erdogan te hian ram pahnihte inlaichinna neihte sawiin, thawhdunna zau leh nghet zawk neih dan turte pawh an sawi dun a ni. A hmaa an lo sawi dun tawh, an ram insumdawn tawnna kum khatah USD tld 5 tlin tir tuma hma lak pawh an remti bawk.

Pakistan PM chuan India nena boruak ṭha lo tak an neih laia Turkey-in a lo thlawp avangin Erdogan chu lawmthu a hrilh. India-in Pahalgam-a firfiakte pawikhawihna chhang let a, Pakistan rama military strike a neih khan Turkey President hian India chet dan demin, Pakistan a tlawp thu hi a lo sawilang a ni. Hemi hnu May 2 khan Karachi port-ah Turkey indo lawng a thleng a, April 27 khan Turkey C-130 Hercules military aircraft pawh Karachi-a thlawh lutin, sipai supply tur an phur nia sawi a ni. Turkey hian ralthuam engmah a supply lo niin sawi mah se, Pakistan-in India a beihnaah Turkey siam Songar drone a hmang ngei tih erawh finfiah a ni.

Sharif hi foreign minister Ishaq Dar, chief of army staff Field Marshal Syed Asim Munir leh information minister Ataullah Tarar ten an ṭawiawm.