Venezuala inthlanah President Maduro party chak

Venezuela ram inthlanpui, Pathiannia neihah president Nicolas Maduro kaihhruai, United Socialist Party of Venezuela (PSUV) leh a thawhpuite an chak. Inthlan hi eptu pawl lian ber chuan a boycott thung a ni.

National Electoral Council (CNE) chuan nimin khan inthlan result hi puangin, PSUV leh a thawhpuite hian vote tla aṭanga 82.68% an hmu pha.

Eptu pawlin inthlan an boycott vangin vote nei mi mtd 21 zingah mtd 8.9 chauhin vote an thlak a, vote thlaktu hi 42% vel chauh a nih phah. Mahse CNE hotu Carlos Quintero chuan kum 2021 inthlana vote thlaktu zat nen a in ang deuh reng niin a sawi thung.

2024-a President thlanna neihah eptu lam chuan an chak niin an sawi a, mahse thuneitu lamin Maduro hi chakah a puang thung. Hei vang hian eptu pawl hi lungawi loin, an ram inthlanpui neih pawh hi an boycott ta a ni. An hruaitute chuan Pathiannia inthlan neihah hian vote thlak lo turin mipuite an ngen a, khawpui lian hrang hrangah pawh vote thlak an tlem hle niin an sawi.

Vote thlak ni hian venhimna khauh taka kalpui niin security agent nuai li chuang an duty a, mi 70 chuang man an ni bawk. Man zingah hian eptu hruaitu, Juan Pablo Guanipa pawh a tel a, vote thlak tih buai tuma puhin thubuai siamsak a ni.