Argentina President hnenah Genesis Prize hlan dawn

Argentina president Javier Milei chu Israel ram a thlawp ṭhat avanga chawimawina, USD mtd 1 keng tel Genesis Prize dawng tura thlan a nih hnuah June 11-ah he chawimawina hi Israel Parliament, Knesset-ah hlan a ni dawn.

Genesis Prize buatsaihtute chuan President Milei hian United Nations-a Argentina-in Israel dodal zawnga vote an thlak zel ṭhinna chu a rawn thlak danglam tih an sawi. Hei bakah Hamas leh Hezbollah pawl chu firfiak pawlah puangin, 1990s chhoa Argentian rama bomb hmanga Juda mite beihna chu chhui ṭha leh turin thupek pawh a ti chhuak bawk a ni, an ti. Milei hian Argentina emmbassy pawh Jerusalem khawpuia sawn a lo tiam tawh bawk.

President Milei hian Israel a pan tawh a, June 11 hian Knesset-ah chawimawina hi hlan a ni dawn a, thu a sawi nghal bawk ang.

Genesis Prize dawng tawh zingah hian New York City mayor hlui Michael Bloomberg, actor Michale Douglas leh Barbra Streisand, violinist Itzhak Perlman, sculptor Sir Anish Kapoor, filmmaker Steven Spielberg leh New England Patriots neitu Robert Kraft te an tel.