NATO-in Iraq-a training mission a titawp

Canada kaihhruaina hnuaia North Atlantic Treaty Organization (NATO)-in Iraq-a training mission a neih mek chu US-in drone missile hmanga Iran general  Qasem Soleimani a thah hnuah tihtawp a nih thu tarlan a ni.

Canada General Jennie Carignan kaih­hruaina hnuaia NATO mission neih mek hi non-combat, advisory leh training mission a ni a, he training-ah hian Canada mi 253 vel an tel a ni. Mission tihtawp hian US kaihhruaina hnuaia Iraq, Kuwait, Jordan leh Lebanon-a beihpui thlak mek erawh a nghawng dawn lo a, hetah hian Canada sipai 600 vel zet chu an tel bawk. 

Canada foreign minis­ter Francois-Philippe Champagn chuan Zirtawpni liam taa US-in Iran general an thah hnu lawkah khan US leh Iran lam chu inbengdai turin a lo ti tawh a ni.

"Canada chuan a thawhpui ramdangte a be pawp reng. Iraq leh a chhehvela Canada mi awmte, sipai leh sorkar mite pawh telin, an himna chu kan ngaihpawimawh ber a ni. Pawl lehlam ve ve chu inbengdai turin kan duh a, kan tum ber chu Iraq muanawm tak siam a la ni reng a ni," a ti. Canada hian Iraq-a an ram mi awmte chu Iraq chhuahsan tura inngaihtuah chiang turin a ti bawk.

US pawhin Iraq-a a ram mite awmte chu a rang thei ang bera chhuahsan turin a ti ve bawk. Iran hian US lakah hian na taka phuba lak a tum tih sawiin, US chu a dem hle tih a sawi a ni.