China-a chemical plant puakah mi 5 an thi

China khawchhak lam, Shandong province-a Weifang khawpui Shangdong Youdao-a Chemical plant chu Thawhlehin khan a puak a, mi panga an thi a, hliam 19 an awm bawk.

Chhiatna thlenna plant hi industrial park-a awm niin damdawi leh rannung thahna siamna tur chemical lam an siam ṭhin. Plant puahna chhan hi hriat a ni lo a, a puak hi a na hle a, a bul hnaia building tukverhte pawh an keh a ni. A puah hnuah a kang zui bawk a, mahse kangṭhelh motor 55 leh kangṭhelhtu 200 chuang tirh niin an ṭhelh mit thuai niin thuneitute chuan an sawi. A bulhnaia chengte chu face mask hmang rih tura hriattir an ni.

Shandong Youdao Chemical hi kum 2019 August thlaa din a ni a, a awmna hmun hi hectare 47-a zau niin thawktu 300 chuang an awm.

China ramah hian industrial plant-a chhiatna hi a thleng fo a, hei hi factory hrang hrangten himna tur, safety standard an zawm ṭhat tawk loh vang nia sawi a ni. Kum 2015 khan Tianjin-a warehouse-a kangmei nasa tak chhuakah mi 170 an thi a, mi 700 chuang an hliam bawk.