Sudan-ah tui hri vangin khar khat chhungin mi 172 thi

Sudan health ministry chuan an ramah tui hri (cholera) a leng mek tih sawiin, hri kai thar mi 2,700 an awm bakah, kar khat chhungin he hri vanga thi hi mi 172 an awm tih a sawi.

Health Ministry-in Thawhlehnia thuchhuah a siamah, April 2023 aṭanga paramilitary Rapid Support Forces (RSF) leh sorkar sipaite inbeihna, Khartoum state-ah hri hi a leng nasa zual tih a tarlang. He state-ah hian inbeihna thleng vang hian tui leh electric supply pawh a mumal lo hle a ni.

Sudan ramah tun hma pawhin tui hri hi a leng fo a, mahse tualchhung indona thleng vanga health system a chhiat chhoh leh, ei tur leh in tur thianghlim tawk lo vangin hri hi a leng ngunin a hluar chho hle. Ram chhunga damdawi-in 90% dawn chu tualchhung indona vang hian hna thawk mumal thei loin an awm niin doctors' union chuan a tarlang. Inbeihnaah hian damdawi-inte beih tel an ni fo a, hei bakah rawk an tawk fo bawk.

RSF leh Sudan sipaite inbeihna avang hian mi sing tel an thi tawh a, mi mtd 13 vel chu hmun him lamah an tlanchhe tawh bawk a ni.