US-in Gaza-ah ni 60 chhung inkahhai puan a rawt

US chuan Gaza Strip-a indo mek, Israel leh Hamas te tana ni 60 chhung inkahhai puan leh, Hamas mi hren Israel mite chhuah vek tur leh Palestinian mi, dam chhunga tang tura hremte chhuah turin rawtna a siam thar leh. Israel chuan US rawtna siam thar hi a pawm nia sawi a ni a, hetih lai hian Hamas lam chuan an ennawn ve leh phawt dawn tih an sawi thung.

US president Donald Trump bakah palai hna thawktu, Egypt leh Qatar chuan he rawtna hi Hamas lamin an pawm a nih chuan, an pawmna thu an ziah rualin Gaza Strip-ah chhawmdawlna thawn luh a ni nghal dawn tih an sawi.

Rawtna siamah hian ni 60 chhung inkahhai puan a, Hamas-in Israel an beih ṭuma an mi man, tun thlenga an la hren nungdam leh thi tawhte pawh inremna an siam kar khatnaah chhuah vek tura tih an ni. Hemi rual hian Israel pawhin an ram jail hrang hranga Palestinian tang zinga damchhung tang tura hremna pek, mi 125 te chhuah tur leh, thi tawh mi 180 ruang hlan turin an ti bawk.

White House chuan US rawtna siam hi Israel chuan a pawm tawh a, Hamas hian vawiin lamah an thutlukna an hrilh dawn niin a sawi.

US bakah Egypt leh Qatar te chuan Gaza-a inkahhai puan a nih theihna atan hian hma an la reng a, mahse an rawtna siamte hi Israel leh Hamas lam hian an pawm dun thei lo ṭhin a ni. Kumin kumtir lam khan Gaza Strip-ah inkahhai thawh khatna chu kalpui a ni tawh a, mahse inremna an siam chhunzawm theih tak loh avangin a thawh hniha an kalpui thei ta lo a ni. Hemi hnu, March thla tir lam aṭang khan Israel chuan Hamas ho hmun hrang hrangte a bei chhunzawm leh nghal a ni.