Brazil-ah lockdown duh loh vangin nawrh huaihawt

Brazil khawpui ṭhen­khatah kar liam ta Inrinni khan Covid-19 vanga lockdown puan duh lohna lantirin mi ṭhenkhatin nawrh an huaihawt. 

Nawrh huaihawtte hi truck, car leh motorcycle-ah te chuangin, an hnam puanzar te an vai bawk. Hri darh tur venna atana governor-ten an bial chhunga inkharkhip (lockdown) an puan avangin hun rei tak chhung sumdawnna hmunte khar a ni tawh a, hei hi duh loin nawrh huaihawtte hian governor-te chu bang turin an phut a ni. 

Brazil president Jair Bolsonaro ngei pawh hi lockdown thlawp lo zing­ah telin, govenor-te pawh a lo sawisel fo tawh a ni. Inkharkhipna kalpui hian hri leng aiin an ram economy a nghawng chhe thei zawk dawn niin a sawi. Hri darh tur venna atana lockdown leh social distancing dan hman thlawptu, Luiz Henrique Man­detta pawh health minis­ter aṭangin a ban tawh bawk a ni. Mipuite chuan Mandetta a ban hi an sawisel nasa hle. 

President Bolsonaro chuan economy hawn leh thuai a tum thu sawi nawn lehin, "Mihring nunna chu thil dang zawng aiin a pawimawh a, mahse kan hma lam hun tur ngaihtuah tel loin thutlukna kan siam ngawt thei lo. Miin a fate ei tur nei loa rilṭama awm hmu se eng tin nge a awm dawn tih hi ngaihtuah tel a ngai a ni," a ti. Engmah thawk thei loa inkharkhip a, mipuite chiaina thlentu politician-te a dem thu sawiin, mipuite chu nundan pangngaia nun an duh tawh a ni, a ti. 

Brazil hi Latin America ramah Covid-19 kai tamna ber ram niin, a kai zat hi 36,500 an chuang tawh a, mi 2,347 in an thihpui tawh. May thla hian hri leng zualkai hun a thleng dawn nia sawi a ni bawk.