Donald Trump-a'n China thungrulhah vau
United States (US) president Donald Trump chuan khawvela hri leng mek, Covid-19 darh chungchangah China chuan hre reng chunga a ti darh a nih chuan thungrulhna nasa tak a tawng ngei ang tiin a vau.
Donald Trump hian hri leng chungchanga China sorkar hma lak dan chu a lo sawisel fo tawh a, US pawh thawhpui ṭha tawk loah a puh fo a ni. "He hri hi a darh danah hre reng chunga thil ti an nih chuan, a nghawng an tuar ngei tur a ni," tiin White House-a news conference a neihnaah a sawi.
Trump chuan coronavirus len hma chuan China nena an inkungkaihna chu a ṭha hle tih a sawi a, mahse rang takin thil a rawn inthlak danglam ta a ni, a ti. "China lakah i thinrim viau dawn em tih zawhna pawh a awm a, mahse thil awmdan a zir a ni ang," tiin a sawi bawk. Hri leng chungchang tihsual palh avanga thunun theih loha a darh leh, hre reng chunga tihdarh chu thil danglam hlak a ni, tiin Trump chuan a sawi a ni. "Heti chung pawh hian hma taka inrawlh kan tum khan min phalsak tur an ni. Mahse min phalsak lo a, thil ṭha lo tak a ni tih an hria a, an zahpui niin ka ngai a ni," a ti.