UN-in thil semna bula inkahna thleng chhui chian phut

United Nations secretary-general, Antonio Guterres chuan Pathiannia US leh Israel thlawp, Gaza Humanitarian Foundation (GHF)-in Gaza Strip-a chhawmdawlna a sem chhuahna bula inkahna thleng vanga mi eng emaw zat thihna thleng chu chhui chian a phut.

GHF-in Palestinian mite tana chhawmdawlna a sem chhuah lai hian centre bula pungkhawmte chu silaia kah an ni a, he pawikhawihna thlenthuah hian Israel leh Hamas chu an inpuh tawn a ni. Red Cross chuan thi zat hi mi 21 niin a sawi a, mahse Hamas sorakar Civil Defence agency chuan mi 31 niin a sawi thung. Hliam tuar hi mi 176 an awm niin an tarlang bawk.

UN hotu hian he thil thleng chungchangah hian thuchhuah siamin, Gaza-a chhawmdawlna dawng tura kal Palestinian mite thah leh hliam a ni chu pawi a tih hle tih sawiin, pawikhawihna thlen dan hi mi dangin an chhui chian thuai a, pawikhawihtute pawh man ngei a phut thu a sawi. Israel foreign ministry chuan Guterres thusawi hi X lamah lo chhang nghalin, Hamas hming a sawilang tel duh miah lo chu thil tenawm tak a ni, an ti.