Khawvel Lawrkhawm

Somali lawng suamhmangten an mi hrente chhuah

Somali lawng suamhmangte chuan kum li chuang zet an hren tawh, Asian sailor 26 chu kar kalta Inrinni khan an chhuah.

Lawng suamhmangte hian kum 2012, March thla khan Oman flag inzarna lawnglian, FV Naham 3 chu Seychelles-ah an man a, he lawnga thawkte hi an hreng zui a ni. An mi hrente hi China, Philippines, Cambodi, Indonesia, Vietnam leh Taiwan ram mite an ni.

Asian sailor-te hi lawng suamhmangten an mi man an hren rei ber zinga mi an ni a, Somalia khawpui, Mogadishu hmarchhak lam km 400 vela hla, Harardheere bula Dabalaga-ah an hreng a ni. Kar kalta Inrinni khan suamhmangte hi chhuah an ni a, Galkayo khuaa zan an riah hnuah Nairobi panpui an ni. Heta ṭang hian anmahni ram lamah thawn haw an ni ang.

Iraq Parliament-in zu khapna dan pawm

Iraq Parliament chuan an rama zu hralh, lakluh leh siam khapna dan a pawm.

Iraq ramah hian dawrte leh bar-ah te zu lei tur a awm a, mahse mi tam tak chuan hei hi Islam sakhaw inzirtirna kalh leh an ram danpui nena inmil lo niin an sawi a, zu khapna dan siam turin sorkar an phut a ni.

Hetihlai hian zu zawrh thlawptu lam chuan an ram danpui chuan sakhaw tlem zawkte zalenna a pe tih sawiin, zu zawrh khapna dan pass tak chu court-ah khin let an tum tih an sawi. Iraq ramah hian hotel leh restaurant-ahte ualau takin zu hi zawrh a ni lo a, mahse a bikin an ram khawpui Baghdad-ah chuan dawrte ah leh bar-ahte lei tur a awm reng nia sawi a ni.

Japan-ah bomb a puak

Japan khawpui, Tokyo hmarlam-a Utsunomiya park-ah nimin khan bomb a puak a, mi pakhat a thi a, mi dang pahnihin hliam an tuar.

Bomb puahna hmun hi Tokyo hmarlam km 100 vela hla a ni a, nimin chawhma dar 11:30 vel khan bomb hi a puak niin fire department thupuangtu chuan a sawi a, a puah chhan erawh hriat a ni lo. Bomb puak hian park-a bicycle parking space a tichhe nasa hle.