Haiti jail aṭangin mi 170 chuang tlanchhuak

Haiti hmarlam tuipui kama Arcahaie jail aṭangin, kar kalta Inrinni khan tang 170 chuang an tlanchhuak.

Arcahaie hi Haiti khawpui, Prot-au-Prince hmarlam km 50 vela hla, tuipui kama awm a ni. Tan-in aṭanga tlanchhuakte hian tang vengtu pakhat that≠in, midang pawhin hliam an tuar. Tang tlanchhuakte hian ralthuam eng emaw zat ru chhuakin, police-te nen pawh an inkap zui a ni.

Province thuneitute chuan tangte hi inbual tura an tanna hmun aṭanga hruaichhuah an nih hnuah, tang vengtute chu an bei zui nghal niin an sawi. Haiti rama tan-in hrang hrang hi a tawt hle a, thubuai ngaihtuah hmaaa kum eng emaw zat tantir te pawh an awm a ni.

Arachaie tan-in aṭanga tlanchhuak hi an zat chiah hriat ni lo mah se, an zingah hian pawikhawihna lianthama inhnamhnawih eng emaw zat an tel tih hriat a ni.

Haiti police-te chuan sorkar thupek angin tang tlanchhuakte man leh tumin beihpui an thlak a, tuipui kam bialah te ngawrh takin an zawng a, an zinga
ṭhenkhat chu an man tawh a ni. Tangte hian uniform an hak loh avangin, an tan bikbo a awlsam phah nia sawi a ni. US Embassy chuan America mite chu tang tlan≠chhuak awmna bialah kal rih lo turin thurawn a pe nghal.