Afghanistan-ah opium china hmun pung

Afghanistan rama opium chinna ram zau zawng chu kuminah 10% in a pung niin United Nations chuan a sawi.

Nikum khan Afghanistan-ah hian khawkheng avangin opium chin zat hi a tlahniam hle a, mahse kuminah ruahtui tla leh khaw awmdante a ṭhat tak avangin an ching uar leh hle niin an sawi. Afghanistan hi Taliban firfiakte sum lakluhna hnar pawimawh tak a ni a, US kaihhruai counter narcotic programme neih ni mah se, drug addict hi an pung chak hle a ni.

Kuminah opium an chin uar avangin, an tharchhuah pawh 43% ve zetin a pung thei dawn niin UN Office on Drugs and Crime (UNODC) chuan a sawi. Nikum khan opium hi ram hectare 183,000 a zauah chin a ni a, kuminah chuan a chinna atan hian ram hectare 201,000 a zau hman a ni. Opium chinna ram 93% hi Afghanistan chhim, khawchhak leh khawthlang lam biala awm a ni.

Taliban firfiak pawl chuan opium chingtute hneah hian chhiah an la ṭhin a, hei hi an pawl inenkawlna atan an hmang ṭhin. Deputy Ministery of Interior for counter narcotics, Baz Mohammad Ahmadi chuan firfiakten Afghanistan sorkar an beih theihna tam zawk chu opium chingtute hnen aṭanga an sum hmuh vang a ni, a ti.

Opium tihrem tuma ṭan lain, ram hrang hrangte chuan Afghanistan-a opium chingtute chu thlai dang ching tura fuihin an pui a, mahse tun hnaiah ram dang aṭanga puihna an hmuh hi a tlahniam hle a, hei vang hian opium chin hi an uar chho leh nia ngaih a ni.