Khawvel Lawrkhawm

Iran President-in US president candidate-te sawisel

Iran President Hassan Rouhani chuan US president candidate pahnih, Donald Trump leh Hillary Clinton-te chu presidential debate an neihah an che mawi lo a tih thu a sawi.

Pathianni-a Arak khuaa mipuite hmaa thu a sawiah, President Rouhani chuan, "Debate an neiha candidate pahnihte ṭawng duh dante, an inpuhchhiat leh innuihzat dante kha in lo hmu em? Hetiang democracy hi kan ramah kan duh ve dawn em ni? Hetiang inthlanna neih hi kan duh ve em ni?" tiin, US president thlanna neih tura an inbeih danah chuan mihring inzahtawnna leh nungchang mawi a awm lo a ni, a ti. Iran state TV chuan US presidential debate hi an tichhuak a, canidate-te campaian kalpui dan pawh uluk takin an thlithlai reng a ni.

Hitler-a hmun siamruk hmuchhuak

Scientist-te chuan Nazi hotu, German dictator Adolf Hitler-a'n Nazi hmunpui a siam ruk tir an hmuchhuak.

Nazi hmun siam ruk hi North Pole aṭang km 1,000 vela hla, Arctic Circle-a Alexandra Land-ah a ni a, a hmun hi 'Schatzgraber' emaw, 'Treasue Hunter' emaw tih a ni. Hun rei tak chhung chu zawn a lo ni tawh a, tunah chuan a awmna thliarkar hi Russian Territory a ni tawh. He hmun hi Hitler-a thupek anga kum 1942-a an siam nia rin a ni a, 1943 khan hmang ṭanin, kum 1944 July aṭang khan an hmang zui ta lo a ni. Researcher-te chuan he hmun hi a awm tih a thu chuan hun rei tak an hre tawh a, mahse an hmuchhuak thei mai lo a ni. Nazi base an hmuhchhuahah hian silai mu, puan in leh pheikhawk te hmuh an ni a, an bungrua hmuhah hian swastiska sign pawh an chuang a ni.

Israel-in Gaza Strip a kap

Israel Air Force-te chuan nimin khan Gaza Strip hmarlama Hamas firfiakte hmun an kap. Hei hi Gaza Strip aṭanga Israel lamah rocket kah a nih vanga a chhanletna a ni. Tun thla chhung hian Gaza aṭang hian Israel ramah ṭum li rocket hi kah a ni tawh a ni.

Israel thlawhtheihna hian Hamas pawl hmun eng pawimawh tak a kap chhia a, mihring thi leh hliam erawh an awm lo a, hmun dang tihchhiat a awm lo bawk nia sawi a ni. Gaza aṭanga rocket kahchhuah zinga pakhat chu Islamic State firfiak pawl nena inzawm, Ahfad al-Sahaba-Aknaf Bayt al-Maqdis pawlin an kah niin an sawi. Mahse Israel chuan Gaza Strip-a Hamas rorelna hnuaia awm a nih avangin, he hmun aṭanga an ram lama pawikhawihna thlengah Hamas chuan mawh a phur a ni, a ti.