Calais camp-a raltlan leh France police-te intibuai

France sorkar chuan an ram hmarlam, Calais-a refugee camp chu ṭhiah a nih tur thu a lo sawi tawh a, hei vang hian he camp-a raltlan awmte chu lungawi loin police-te nen an intibuai.

Camp ṭhiah hna hi vawiin aṭangin thawh ṭan a ni dawn a, he camp-a raltlan awmte chu an ram chhung hmun hrang hranga centre-ah sem darh an ni ang. Pathianni khan a hmunhma enfiah tur leh, hma lak dan turte enin police-te tirh an ni a, ral≠tlante chuan an awmna camp ṭhiahsak an ni tur chu duh loin police-te hi an lo tibuai a ni. Police-te chuan mipui thinrimte hnawhdarh nan hian tear gas an hmang.

France rama raltlan lut tam zawk hi Britain ram pan tumte an ni a, tam tak chuan Calais camp aṭang hian Britain hi an lut tawh a ni. Pathianni pawh khan raltlan rawlthar rual eng emaw zat chuan Britain hi an thleng a, mi tam zawk an luh belh rin a ni bawk.

Calais camp-ah hian ral≠tlan 10,000 chuang an awm rin a ni a, an zingah hian naupang kum tlinglo 1,179 vel an awm bawk. Naupang tam zawk hi chhungte emaw, hruaitu emaw nei lo an ni. Raltlante hi bus hmangin hruaichhuah an ni dawn a, France ram≠chhunga reception center 450-ah sem darhin, an hriselna dinhmunte enfiah sak vek an ni ang. Raltlante hi lakchhuah fel an nih hunah khawl lian hmangin an awmna puan in leh bukte chu tihchhiat a ni dawn a, ni thum chhunga zawhfel hman beisei a ni.

France Interior Ministry chuan raltlante chungah tihluihna hman an duh lo tih a sawi a, mahse sorkar hmalakna lo dodal an awm emaw, NGO zingah harsatna lo siamsak an awm emaw a nih chuan police-te tharum hman tir mai an ngai mai dawn niin a sawi.