Pakistan Police academy beihnaah police 60 an thi

Pakistan-a Balochistan province khawpui, Quetta-a Police Training College chu Thawhṭanni zan khan firfiakten an bei a, police 60 an thi a, mi 118 in hliam an tuar. Hliam tuar zinga ṭhenkhat chu an dinhmun a ṭhat loh avangin thi zat hi an la pun rin a ni bawk.

Balochistan province home minister Sarafaraz Bugti chuan Saryab Road-a police academy beitu firfiakte hi mi panga emaw, paruk emaw an nih thu a sawi a, beih a nih lai hian college-ah hian police training lai 200 vel an awm niin a sawi.

Police Training College beitu zinga firfiak pahnihte chuan security force-te'n an beih let hnuah thihchilh bomb an pai chu an tipuak a, pakhat chu an kaphlum hman a ni. Heng firfiak pathumte hian thihchilh bomb an pai vek niin Frontier Corps IG, Major General Sher Afghan chuan a sawi. Firfiakte leh security force-te hi darkar nga zet an inkap zui a ni.

Pakistan firfiak pawl, Lashkar-e-Jhangvi(LeJ) chuan police academy beitu an nih thu an sawi. LeJ hian tunhma lam pawhin security force-te an lo bei fo tawh a, a bikin Punjab province-ah pawikhawihna an thlen fo a ni.

Academy beih a nih avanga police hliam tuarte hi Quetta-a damdawi-in hrang hrangah dah an ni a, sorkar damdawi-inahte chuan emergency puan nghal a ni bawk.

Quetta-a police academy hi kum 2006 leh 2008 khan beih a lo ni tawh bawk a, college beitute hian college playground chu rocket hmangin an kap a ni.

Thawhṭanni vek khan Quetta chhim lam km 145-a hla, Surab khuaah firfiakten custom officer pahnih kaphlumin, pakhat an kap hliam a, Khyber Pakhtunkhwa province-ah police intelligence officer kahhlum a ni bawk.

LeJ firfiak pawlin police academy beitu an nih thu an puan hnuah, Pakistan sorkar chuan Interior Ministry ngenna angin an rama firfiak nia hriat mi 5,100 te account chu khawih chet theih lohin a hrek sak nghal a, an zingah hian JeM hotu Massood Azhar pawh a tel.

State Bank of Pakistan (SBP)-in account a hrek sak zingah hian Anti-Terrorism Act, 1997-a ram himna tiderthawng thei, firfiak nia puh mi 1,200 an tel. Account an hreksakte hlut zawng hi dollar maktaduai 400 hu a tling a ni.