Gaza-ah kan indo leh chuan a tawpna a ni tawh ang : Israel Defence Minister

Israel Defence Minister Avigdor Lieberman chuan Gaza Strip-ah Pakistan firfiakte nen an indo leh a nih chuan a tawpna a nih tawh tur thu sawiin, firfiakte chu an nuai chimit vek tawh dawn tih a sawi. Hemi rual hian Gaza-a indo chawh chhuah leh chu an tum ber a ni lo tih a sawi.

Palestinian chanchinbu, Al-Quds-in a kawmnaah, Lieberman chuan Gaza Strip-a roreltu, Palestinian firfiak pawl, Hamas-te chuan an policy atthlak tak titawp turin Palestinian mipuiten nawr se a duh thu a sawi.

Defence Minister chuan an ṭhenawm, Gaza Strip, West Bank, Lebanon leh Syria-te nena indo leh an tum lo tih a sawi. Mahse Gaza-ah chuan Israel tihbo duhtute an awm a, Israel lakah indo an puang leh a ni chuan an tawpna tur a ni tawh ang, a ti.

Lieberman chuan Palestinian president Mahmud Abbas pawh sawiselin, remna leh muanna a awm theihna tura che na ngam tawk loah a puh. Palestinian mipui tam zawkin an president, kum 81 mi hi bang turin an duh tawh tih sawiin, inthlan buatsaih ni se chuan a tlak tawh tur thu a sawi bawk.

Hetih lai hian Palestinian mi tam tak chuan social media lamah Israel official interview a neihpui avangin Al-Quds chanchinbu hi an sawisel nasa hle. Lieberman hian defence minister a nih hmain Palestinian chungchangah thu huathlala tak tak alo sawi fo tawh a, Gaza Strip-a Hamas hotu Ismail Haniya pawh na takin a lo bei tawh a ni.