Khawvel Lawrkhawm

Japan-in NKorea thawhpui company-te hrek dawn

Japan sorkar chuan North Korea-in missile leh nuclear ralthuam a enchhin chhunzawm zel avanga hremna kawng khat atan, NKorea thawhpui foreign company-te a hrek dawn.

Japan-in blacklist a siam tur hian China company-te a nghawng nat ber rin a ni. NKorea ramri bulah hian China company eng emaw zat an inbun a, an ni hian NKorea hi an thawhpui a ni.

Foreign company hrekna siam tur hi ramchhung≠ah ngei pawh dodalna a awm ngei rin a ni a, hemi atan hian sorkar pawh a inbuatsaih lawk a ni. He hrekna siam tur hian NKorea mi hnathawka chhawrtu company-te pawh a huam tel vek ang. Company blacklist-a telte thil neih, Japan ram chhunga mi chu khawih chet theih loha hrek sak a ni dawn a, Japan company-te nena an indawr khap a ni bawk ang.

Calais camp-a awmte sawnchhuak tan

France sorkar chuan Calais refugee camp-a awmte chu ramchhunga reception centre hrang hrangah dah turin a sawnchhuak ṭan ta. Calais camp hi a tichhe zui nghal dawn a ni.

Camp-a raltlan awmte leh a hmunhma enfiah tura kal police-te chu a hmain lo intibuai tawh mah se, raltlante hruaichhuah hna hi boruak ṭha tak hnuaiah kalpui a ni. Camp-ah hian police 1,200 chuang duty tir an ni a, Thawhṭanni aṭang khan bus hmangin hruai chhuah an ni. Reception centre hrang hrangah dahin, heta ṭang hian sorkarah humhimna dilin, an rama awm phalsak turin an ngen thei dawn a ni. Calais camp-ah hian raltlan 6,500 vel an awm niin thuneitute chuan an sawi a, he camp-a awmte hi Britain rama luh tumte an ni. Mahse chhawmdawl hna thawktu pawlte chuan camp-ah hian mi 8,300 chuang an awm niin an sawi thung.

Clinton-i'n point 5 in hma hruai

US President thlanna neih turah Democratic Party candidate Hillary Clinton-i chuan a khingpui, Republican Party candidate Donald Trump-a lakah point 5 in hma a hruai.

CNN/ORC-in mipuite ngaihdan lak hnunhnung ber a tihchhuahah, kum 68 mi Clinton-i president atana duhtu hi 49% awmin, kum 70-a upa Trump-a duhtu hi 44% an awm. Kum 45 hnuai lam zingah Hillary Clinton-i duhtu hi an pung hle a, opinion poll lak hmasakah 47% chu 53% an tling tawh a ni. Hmeichhe zingah Clinton-i hi a sang fal bawk a, point 12 zetin an inthlau a ni.