US-in UNSC Gaza resolution a dan sak

US chuan Nilainia United Nations Security Council (UNSC) in Gaza Strip-a inkahhai puan phutna resolution a siam chu a veto power hmangin a dan sak.

UNSC draft resolution-ah hian Gaza Strip-a inkahhai puan nghal a, bithliah awm loa chhawmdawlna thawn luh phutna pawh a tel. He resolution hi council member 14 in an thlawp a, mahse US chuan a thuneihna hmangin a lo dansak thung. UN-a US acting ambassador, Dorothy Shea chuan vote lak hmain eng resolution pawh, Hamas chet dan demna leh Hamas-te an ralthuam dah thla tura phutna dah tel a nih loh chuan US-in a thlawp dawn lo tih a lo sawi sa a ni. Hei bakah UNSC resolution duan hian US kaihhruaia Gaza-a inkahhai puan a nih theihna tura hma lakna chu a rawn tibuai thei dawn niin a sawi bawk.

Dorothy Shea chuan, "Remna leh muanna a awm ngei kan duh, mahse Hamas te intuaitharna tur siam zawnga remna siam erawh a ni tur a ni lo," tiin UNSC resolution chuan an duh ang thil hi a pha lo tih a sawi a ni. Resolution thlawp zawnga vote-tu ramte chu remna leh muanna tak tak thlenna tur ni lo, pawikhawihna thlen tamna tur kawng zawk thlangah a puh a ni.

Israel lam pawhin thu delhkilh awm loa Gaza Strip-a inkahhai puan chu an pawm lo tih sawiin, Gaza-ah Hamas te an awm zui zel a rem lo tih a sawi. Hamas erawh chuan US thiltih hi an dem thu an sawi thung a, Israel lam ṭang lutukah an puh let thung.