US-ah Covid-19 vanga thi 40,000 an chuang tawh

Khawvela coronavirus hri len hluar berna ram ni mek, United States (US)-ah chuan hri kai zat hi nuai ruk an tling tawh a, he hri vanga thi hi 40,000 chuang an awm tawh bawk. 

US-a Covid-19 vanga thi zinga a zahve dawn hi New York state-a mi an ni a, hri kai leh hri vanga thi an pung zel chung hian US state hrang hrangah chuan sorkarin lockdown a puan duh lohna lantira nawrh huaihawt an awm thung. 

New York state pawh hri leng tuar nasa ber state a ni chungin, kar leh Thawhṭanni aṭang hian khuahkhirhna a siam ṭhenkhatte thlahdul a tum. Kar leh aṭang vek hian health department chuan state chhungah antibody testing runpui neih ṭan a tum bawk. 

US vice president Mike Pence chuan an ram chuan testing kit a ngah tawk tih sawiin, state hrang hrang te pawhin lockdown hlihna tura tehna siamte pawh an tlin vek a ni, a ti. 

Lockdown hlip tura tehna siam zingah hian ni 14 chhung hri kai thar zat an tlahniam em tih leh, damlo te enkawlna turin hospital-ah hmun a awm tam tawk em tihte a tel a ni. Hengte hi state hrang hrang chuan an tlin niin Pence chuan a sawi. 

New Zealand prime minister Jacinda Ardern chuan ram puma lockdown puan chu pawhsei a ni dawn tih a sawi a, hemi rual hian kar leh Thawhṭanni aṭang chuan khuahkhirhna ṭhenkhatte erawh chu thlahdul a ni ang, a ti. 

PM chuan April 27 aṭangin an rama Alert Level 4 lockdown tih tawp a ni ang a, mahse hemi hnu pawh hian Alert Level 3 lockdown chu kar hnih chhung hman chhunzawm a la ni dawn tih a sawi. 

Malaysia Parliament, Dewan Rakyat  chu May 18 hian hawngin, ni khat chauh rorel inkhawm neih a ni dawn. Hei hi kumin chhunga Parliament inkhawm an neih hmasakna ber tur a ni. 

Parliament inkhawmah hian debate neih a ni dawn lo a, coronavirus kaihhnawih thil chauh ngaihtuah a ni dawn tih Dewan Rakyat secretary Riduan Rahmat chuan a sawi.

Hetih lai hian eptu lam chuan prime minister Tan Sri Muhyiddin Yassin hnenah ni khat chauh rorel inkhawm neih hun atana ruat hi ngaihtuah ṭha turin an ngen a, hri leng mek chungchanga hma lak dan tur sawihona turin ni khat chauh chu a tawk lo tih an sawi. 

Autralia rama economist rualte chuan prime minister Scott Morrison hnenah open letter thawnin, lockdown pawhsei an phut thu an sawi. Hei bakah hian  cabinet hnenah social distancing dan khauh zawka kalpui a nih theihna tura sorkar nawr turin an ngen bawk. 

Open letter an thawnah, economist rualte chuan lockdown hlih hmanhmawh chu a ṭha lo nia an ngaih thu leh, khuahkhirhna hlih hma hi economy leh hnathawktute ten an chhawr dawn nia ngaihna chu a dik lo a ni tiin, khuahkhirhna hlih hma a nih chuan hri a darh chak phah dawn a, hei hian nghawng ṭha lo tak a nei zawk dawn a ni, an ti. 

Israel ministry of health chuan coro­navirus testing laboratory pakhat chu test result dik lo a siam avangin kharsak nghal a nih thu a puang. 

He laboratory hi Weizmann Institute of Science (WIS) ami a ni a, April 17 khan Israel chhim lama Assuta Hospital chuan WIS lab-in Covid-19 positive nia a puan, damlo pakuate an damdawiina dahte chu an hriselna a ṭha tih a sawi a ni. Hospital dang pahnih pawhin WIS lab-in coronavirus kai nia a sawite chu he hri an kai loh thu an sawi ve bawk. 

Hemi hnu hian health ministry chuan thil awmdan hi chhui chiangin, WIS lab aṭang hian hri kai lo mi 19-te chu Covid-19 kai anga tarlan an nih thu a sawi a, laboratory hi a kharsak zui nghal ta a ni. 

North Korea-in an ramah coronavirus kai an la awm lo nia a sawi chu SARS leh flu a len laia doctor hna lo thawktu, kum 2012-a South Korea-a tlanchhia Choi Jun Hun chuan a ring lo tih sawiin, NKorea sorkar chu dawt sawiah a puh. 

The Associated Press-in an kawmnaah, Choi chuan North Korea-a SARS leh flu a len lai khan, hmarchhak lama Chongjin khuaah doctor hna a thawk ṭhin tih a sawi. Hemi ṭuma hri leng pawh hi a kai leh kai loh hriatna turin test kit pawh an nei lo a, thermometer pawh damlote endikna tur an nei tih a sawi. An dam lo enkawl eng emaw zat an thih hnuah pawh hri hi an kai em tih hriat theihna pawh an nei lo a, health official-te chu hri kai awm leh awm loh sorkar laipuia thehluh tur pawha hriattir an nih loh thu a sawi a ni. 

Hei vang hian tun ṭuma khawvela leng mek, Covid-19 lakah North Korea a la fihlim nia an ram hruaitute an sawi chu thu dik lo a ni tiin Choi chuan a sawi. Health expert tam tak pawhin NKorea-a hri kai an la awm lo nia sawi hi an ring lo hle bawk.