France-in Calais refugee camp ṭhiat ṭan

France sorkar chuan Calais refugee camp-a awmte, ram chhunga reception centre hrang hranga sawndarh tura a phurh chhuah hnuin, camp-a puan inte chu a ṭhiat ṭan nghal.

Calais-a refugee camp, Jungle Camp tia an sawiah hian raltlan leh Europe ram hmun danga pem luh tum mi 6000-8000 vel an awm a ni. A tam ber hi Afghanistan, Sudan leh Eirtrea ram aṭanga kal an ni a, Britain rama luh tumte an ni.

Thawhṭanni aṭang khan camp-a awmte hi sawnchhuah ṭan an ni a, Thawhlehni aṭang khan puanin leh buk an siamte chu ṭhiatin, a thianfai
ṭan nghal a ni. Nimin khan raltlan awmte hi hruaichhuah kim hman tum a ni.

Hetihlai hian camp-a awm tam tak chuan Britain ram pan an la tum reng tih sawiin, France ramchhung hmun danga sawnchhuah hi an duh lo hle. Mahse France sorkar chuan camp-a awmte chuan France rama awm dilna an thehluh loh chuan an ram lama thawn kir an ni dawn tih a sawi thung.

Raltlan awm zinga kum tling lo, Britain rama chhungte awm chu Britain ramah thawn luh an ni dawn a, hetianga thawnluh theih naupangte chu a rang thei ang leh, him taka an ramah thawn turin Britain Interior Minister Amber Rudd chuan France sorkar hnenah a ngen.

Nikum chhung khan Middle East, Asia leh Africa aṭangin tualchhung indona leh ram retheih lutuk avanga tlanchhia, Europe rama lut hi mi maktaduai khat chuang an awm. Raltlan an pun chak avangin Europe ram pawhin harsatna an tawh phah a, raltlan lakluh chungchangah European Union member ram 28-te pawh an inlungrual thei lo.