Venezuela President thubuai Siamsak tum

Venezuela-a eptu pawl chakna National Assembly-ah, President Nicolas Maduro-a lakah thubuai siamsak a nih theih nan Thawhlehni khan resolution siam a ni a, mahse Maduro chuan he thil hi dan kalha tih niin a sawi thung.

Eptute chuan Maduro hi dual Colombian citizen a nih avangin Venezuela rama dinhmun sang ber, President dinhmun chelh thei a ni lo tih an sawi. Resolution pass tura vote lak dawn hian eptu leh rorellai member-te an inhnialbuai nasa hle. Mahse Supreme Court chuan National Assembly thutlukna siam hi pawm a ni lo tih a sawi. Eptute chuan Supreme Court hi Maduro-a'n a duh anga a thunun theih a nih thu an sawi thung.

Venezuela President hi bang tura phutin eptu pawl hrang hrngte chuan an nawr reng a, a thuneihna aṭanga paihthlak a nih theihna tura mipui ngaihdan lak an tumna pawh Maduro hian a lo dan sak a ni.

President Maduro hi Middle East, Vatican leh Portugal ram tlawha zinchhuakin, Thawhlehni khan an ramah a kir chauh a, hemi ni vek hian amah thlawptuten Caracas-a kawng an zawh a telpui a ni. Maduro chuan Vatican-ah Pope Francis hmuin, eptu pawlte nen an inkar harsatna awm mekte chingfel tura inbiakna an neih theih nan mal pawh a sawm niin a sawi.