Bangladesh-ah mitthi vuiten lockdown zawm lo

Bangladesh-a Islamic zirtirtu kum 56 mi Maulana Zubayer Ahmad Ansari chu kar liam ta ni 17 khan a thi a, Inrinniah vui niin a vuinaah hian muslim mi nuai khat chuang an pungkhawm. 

March 24 aṭang khan Bangladesh-ah hian lockdown puan a ni a, April 4 thleng puan belh a nih hnuah April 25-ah sawn hlat leh a ni. Bangladesh-ah hian lockdown puan a nih bakah April 10 khan zan lamah curfew puan zui a ni a, mi panga aia tam punkhawm khap a ni bawk.

Ram pumah lockdown puan a ni chungin Inrinnia Ahmad Ansari vuinaa tel tur hian Bangladesh khaw hrang hrang aṭangin a vuina hmun, Brahmanbaria-a Jamia Rahmania Madrasa an pa khawm a ni. 

Police-te chuan mipui kalkhawmte hi lo dan tum mah se, an tam tham em avangin an thunun zo lo tih an sawi. Lockdown hman mek a ni chunga hetianga punkhawm phalsak an nih dan chhuitu tur committee an din nghal tih Bangladesh Police Central thupuangtu chuan a sawi. 

Bangladesh-ah hian hri kai hi 2,456 an tling tawh a, chung zinga mi 75-te chu enkawl dam tawh niin, mi 91 in hri hi an thihpui tawh bawk a ni.