Mosul aṭangin mi 10,000 chuang sawnchhuak

Iraq sipaiten Islamic State (IS) firfiakte kut aṭanga an ram khawpui lian pahnihna, Mosul lak let tuma October 17 aṭanga beihpui an thlak hnuah he khuaa civil mi cheng 10,000 chuang chu an awmna hmun aṭangin sawnchhuah an ni tawh.

IS firfiakte hian kum 2014 khan Mosul khua hi Iraq sipaite kut aṭangin an laksak a, firfiak leh sipaite inbeihna thleng vang hian Iraq mi maktaduai 3.3 chuang chu hmun him lamah an tlanchhe tawh a ni.

UN Office for the Coordination of Humanitarian Affairs chuan Mosul khuaa beihpui thlak a nih hnuah mi 10,500 vel chu sawnchhuah an ni a, chhawmdawl ngaiin an awm mek tih a sawi.

Special force Maj.Gen. Haider Fadhil chuan Tob Zaw leh a bul khaw danga chengte chu Khazer biala camp-ah sawn an ni tih a sawi a, hei hi firfiak leh sipaite inbeihna thleng mek avanga an himna tur an ngaihtuah vang a ni, a ti. Special force-te hian firfiakte ram lak tawh lakkir leh tumin Mosul khawpui khawchhak lamah beihpui an thlak mek a, chhim lam aṭangin Iraq sipai dangten an bei bawk. Firfiakte hi Shura khua aṭangin an inhnuhkir tawh a, an himna atan civil mite chu inphenna atan hmangin mi eng emaw zat an hruai tel nia sawi a ni.

Sipaiten beihpui an thlak hnuah, firfiakte hian Mosul leh a chhehvel biala civil mite kut an thlak nasa nia sawi a ni a, Iraq police officer hlui 50 an man te pawh an that a ni. Anni bakah hian Mosul chhim lamah firfiakten an kahhlum, civil mi 70 ruang hmuh a ni bawk.