Cuba chungchanga UN vote lakah US hai

United Nations General Assemby meeting, New York-a UN headquarters-a neihah America-in lawnglian hmanga Cuba rama bungraw phurh luh a khapna titawp tura phutna resolution siamah vote lak a ni a, vote laknaah hian US chu a hai thung.

US hi UN-a vote laknaah kum 25 chhunga a hai ṭum khatna a ni. UN-in annual resolution a siam hi a thlawp lamah vote 191 a tla a, US leh Israel an hai thung. A duh lo lamah vote an awm lo.

US President Barack Obama chuan Cuba ram nena an inlaichinna siam-
ṭha tura hma an lak meknaah, kum tam tak Cuba ram an lo hrek tawhna hi hlip turin Congress pawh a lo ngen tawh a ni. US ambassador Samantha Power chuan Cuba chungchanga resolution siam hi US chuan a dodal zawngin a vote ziah ṭhin tih a sawi a, mahse tun ṭumah erawh chuan Cuba ram nena thawhdunna kawng an zawh theih nan vote laknaah an hai ta tih a sawi.

Kum 1961-a Fidel Castro-a'n thuneihna a chan khan US chuan Cuba nena an inzawmna hi a titawp a ni. Mahse kum 2015, July thla khan US leh Cuba hian an inkar boruak siamṭhat dan kawng zawngin palai intirhtawn an lo remti tawh a, thla khat hnuah Cuba khawpui, Havana-ah US embassy hawn nghal a ni. March thla khan Obama chuan Cuba ram hi a lo tlawh tawh bawk a ni. Mahse insumdawn tawnna leh sum lama thawhdunna tluantling nei leh tur chuan Congress pawmpuina lak phawt a ngai dawn a ni. Congress-ah hian Republican-in majority an nei a, inzawmna nghet siam a nih hmain Cuba rama human rights dinhmun chu ngaihven phawt a ṭul niin an ngai.