Venezuela rama kawngzawhnaah buaina chhuak

Venezuela khawpui, Caracas leh khawpui dangah President Nicolas Maduro leh a kaihhruai sorkar laka lungawi lohna lantira kawngzawhnaah buaina a chhuak a, kawng zawh zingah 20 in hliam an tuar a, mi 80 man an ni bawk.

Eptute chuan President Maduro paihthlak a nih theih nan mipui vote lak phutin signature petition siam turin hma an la mek a, mi maktaduai 1.8 signature an lahawm tawh a ni. Electoral thuneituten petition an pawm theih nan signature nuai li hmuh tlin a ngai a ni.

Thawhlehni khan eptu lam chakna, Parliament lower house chuan President Maduro laka thubuai siamsak tura phutna resolution an lo pass tawh a, mahse hei hi President chuan dan kalh niin a sawi.

Khawpui lian hrang hrangah lung≠awi lohna kawngzawh hi huaihawt a ni a, kawngzawhte leh police-te an innawr buai a ni. Eptute chuan sorkarin mipui vote lak phutna chu a dan sak zel a nih chuan president palace-ah kawngzawh huaihawt leh an tum tih an sawi.

Bus driver leh union leader hlui, President Maduro hi Venezuela-in sum lama harsatna lian tak a tawh mekah mawhphurtu niin eptute chuan an puh. Oil ngah ram ni mah se, Venezuela hian sum lamah harsatna a tawk mek a, ei leh in lama an indaih lo nasa hle a, thil man a sang chak hle bawk. Eptu pawlte hian President Maduro ban phut hian kar tin kawngzawh an huaihawt a ni.

Hetih lai hian President Maduro chuan eptu pawlte chu rampawn lam mite nena inzawmnna neiah puhin, US puihnain a kaihhruai sorkar chu tihluihna hmanga paihthlak tumah a puh. An ramin harsatna a tawh chhan chu khawvel pum huapa oil man a tlakhniam vang leh, US kaihhruaiin an ram sum dinhmun tihchhiat tuma beih an nih vang niin a sawi. Mahse eng kawng mahin President a nihna aṭang chuan a ban loh tur thu a sawi.