Duterte-a'n midangte lakah chhia chham tawh dawn lo

Philippines President Rodrigo Duterte chuan ṭawngkam mawilo tak tak hmanga chhechham a chin ṭhin chu, a sim tawh dawn tih Pathian hnena a intiam thu a sawi.

Japan ram tlawha a zin haw lam, thlawhtheihnaa a chuan laiin aw a hriat thu a sawi a, chhechham a chin ṭhin chu a tawpsan loh chuan, an thlawhtheihna chu a chesual dawn a ni tiin aw-in a hrilh a, hei vang hian chhia a chham ṭhin tawpsan chu a tiam ta tih a sawi.

Duterte hian an rama ruihhlo laka indo a puan an kalpui dan sawiseltute chu ṭawngkam chhe tak takin a lo sawi tawh a, US President, Pope Francis leh European Union-te chu ṭawngkam mawi lo taka sawiin, UN chhuahsanah a vau a, Indopui II hunlaia Juda mi nuai tel suattu Hitler-a nen intehkhinin, an rama drugs addict maktaduai thum chu tihhlum a hreh loh thute a sawi a ni.

Duterte chuan aw a hriat hnu hian Pathian hnenah intiamin, ṭawngkam mawilo leh midangte anchhia hlawhna lam thu sawi tawh loh a tiam a, Pathian hnena a intiamna chu Philippines mipuite hnena a intiamna a ni nghal tih a sawi. Hemi rual hian a thutiam chuan huam chin a nei tih sawiin, US, EU leh political lama a hmelma Senator Leila de Lima-te chungchang a sawinaah chhia a chham dawn leh dawn loh chu a hun a zir a ni, a ti.