Madagascar-ah mi maktaduai 1.5 te riltamin awm mek
United Nations chuan khawkheng nasa tak an tawrh avangin Madagascar chhim lam biala mi maktaduai 1.5-te chuan ei tur mumal nei loin rilṭamin an awm mek a ni, a ti.
Khawkheng hian thlai thar chhuah lama a nghawng na hle a, bial ṭhen≠khatah chuan an thlai thar chhuah chu 60% zetin a tlahniam a ni. Hei vang hian mi tam zawk chu ram dang
aṭanga ei tur an lakluhah an innghat a ni. Chhim lam bial bikah chuan vaimin an tharchhuah ṭhin chu kum 2015 aiin kuminah 80% in a tlahniam a ni.
Ei tur an thar chhuah a tlakhniam avangin thil man pawh a sang chak hle. Mi tam tak chuan thlai chi atana an dahte chu an ring tawh a, ei tur leina atan an bungrua neihte an hralh ṭhin a ni. Heng mite hi ṭanpui thuai an ngai a ni, tiin UN chuan a sawi. Food and Agriculture Organisation (FAO) chuan November thla hi thlai chin hun a nih chhoh leh dawn vangin, loneitute harsatna tawk mekte chu ei tur bakah, thlai chi leh hnathawhna hmanruate pek an ngai tih a sawi.
Kuminah ruahtui a tlak ṭhat loh avangin Africa ram dangte pawhin harsatna an tawk bawk a ni.