Khawvel Lawrkhawm

Antarctica-ah marine protected area lian ber

Ram hrang hrang 24 aiawh leh European Unoin chuan Antarctica-a Ross Sea chu khawvela marine protected area (MPA) lian berah puan an remti.

Southern Ocean-a Ross Sea hi km maktaduai 1.57 bial a ni a, marine protected area-a puan a nih chuan, kum 35 chhung a huam chinah hian sangha man khap a ni thei dawn a ni. Ross Sea-ah hian khawvela Adelie penguin 38% an awm a, Antarctic petrel 30% leh minke whale 6% an awm bawk. Hei bakah hian whale leh seal-te chi, krill tam tak awmna hmun a ni bawk. Mahse boruak lum zel avang leh sangha mantuten an man nasat avangin an kiam chak hle. MPA atana Ross Sea puang tura rawtna hi New Zealand leh US in an siam a, hei hi ram dangte pawhin an lo thlawp nghal a ni. MPA-a puan a ni tak avangin sangha man khap a ni dawn a, mahse research ti turte tan bika krill leh toothfish an manna turin special zone siam ani ang.

Russia-in a chemical ralthuam tichhe vek dawn

Russia chuan chemical ralthuam a neihte chu kum 2017 kumtawpah chuan a tichhe vek tawh dawn tih a sawi.

Chemical ralthuam tihchhiatna tura military in charge, Col. Gen. Valery Kapashin chuan chemical ralthuam tichhe vek tura an hun tiam aiin kum khatin an sawn hma tih a sawi. Chemical Weapon Convention-a thurel a lo pawm tawh angin, Russia hian a chemical ralthuam a neih zawnga 93% chu a tichhe tawh a ni. Heng ralthuam tihchhiatna tur hian plant pawh eng emaw zat a siam a ni.

Pakistan-ah sorkar duh lohna kawngzawh huaihawt

Pakistan-a Pakistan Tehreek-e-Insaf (PTI) party chuan nimin khan Prime Minister Nawaz Sharif-a ban phutin an ram khawpui, Islamabad-ah kawng an zawh. Kawngzawh hma hian police-te chuan PTI member 40 chuang an man.

PTI hotu, Imran Khan chuan PM Sharif-a eiruknaa inhnamhnawiha puh a nih avangin bang turin an phut tih a sawi. Kawngzawh an huaihawt tur dan nan hian Islamabad khawpui chhunga mi panga aia tam punkhawm khapna dan hman ni mah se, sorkar thupek chu an zawm lo a ni.