US-in pemluh phalna titawp lailawk dawn
US president Donald Trump chuan Thawhṭanni khan an rama pemluh theihna chu hri leng vanga tih tawp lailawk a nih tur thu a sawi.
"Hmuh theih loh hri leng Covid-19 vangin US chuan harsatna a tawk mek a, kan ram mi leh sa te kan humhim a ngai a, chuvang chuan pemluh theihna chu tih tawp lailawk a nih theih nan Executive Order ka sign dawn a ni," tiin Trump chuan a twitter-ah a sawi.
Trump leh a kaihhruai US sorkar hmalak tumna hi Democrats lam chuan sawiselin, buaina a siam belh zawk a ni an ti.
March thla khan Trump chuan Mexico leh Canada aṭanga US-a luh tumte chu thawn haw zel an nih tur thu hi a lo sawi tawh a, ramri kana an rama lo lutte avangin hri hi a pun belh a hlauh thu a sawi bawk.
US hi khawela Covid-19 hri kai tamna ber ram a ni mek a, hri kai hi mi nuai sarih chuang an awm tawh a, chung zinga mi 72,389 chu enkawl dam tawh niin, mi 42,518-in an thihpui tawh bawk.