Israel-ah ṭangrual sorkar siam remti
Israel prime minister Benjamin Netanyahu leh a khingpui, Blue and White party hotu Benny Gantz-te chuan thuneihna insem a, ṭangrual sorkar din an remti thei ta.
Hun rei tak sorkar thar siam thei awm loa an buai hnuah, Likud party hotu Netanyahu leh sipai hotu hlui Gantz-te hian Thawhṭanni zan khan inremna hi an siam thei ta a ni.
Kum thum chhung atana inremna an siamah Netanyahu hian prime minister dinhmun hi kum khat leh a chanve chelh phawtin, Gantz hi deputy prime minister a ni ang.
Nakkum October thlaah an dinhmun hi an inthlak thleng dawn thung a ni. Gantz-a party hian ministry pawimawh zual an chang dawn a, heng zingah hian foreign affairs leh defence pawh a tel. Hetih lai hian Netanyahu-a party lam hian judiciary lam an chang dawn thung a, PM hi thubuai hmachhawn mek tur a nih avang he ministry pawh an party hian chan ngei an duh a ni.
Inremna an siam hnua thuchhuah inṭawm an siamah, an rama hri leng vangin ṭangrual sorkar thar chu thla ruk chhung 'emergency goverment' angin a awm phawt dawn tih an sawi. Hemi chhung hian hri leng kaihhnawih thil tih loh chu eng dan mah siam thar leh ngaihtuah a ni rih lo ang.
Israel ramah hian Covid-19 kai hi mi 13,000 chuang an awm tawh a, mi 173 in an thihpui tawh bawk.