Turkey-in sorkar hnathawk 10,000 a ban

Turkey sorkar chuan sorkar paihthlak tuma beihnaa mawhphurtu bera a puh, US-a awmhmun khuar, Islam hruaitu Fethullah Gulen nena inzawmna neia puh, sorkar hnathawk mi 10,000 a ban leh a, media office 15 a kharsak bawk.

July thlaa sorkar beihnaa inhnam≠hnawiha puh, mi 100,000 chuang chu an hna aṭanga ban leh suspend an lo ni tawh a, mi 37,000 man an ni tawh bawk. Sorkar beihnaa inhnamhnawihte dapchhuah leh man chhuah vek an tum thu thu≠neitute chuan an sawi.

Sorkar hnathawk ban thar zingah zirtirtu, health worker, prison guard leh forensic expert te pawh an tel a, kar kalta Inrinni aṭang khan an hna aṭang hian ban an ni.

Eptute chuan sorkar hmalak dan chu sawiin, democracy kal≠phung kalh a ni, an ti. Mahse sorkar lam chuan sorkar paihthlak tuma beihnaa mi 240 chuang zet an thih hnuah, an thil tih chu tih awm tak a nih thu a sawi thung.

Chanchinbu an kharsak zinga a tam zawk hi Kurdish chhimchhak lam biala mite an ni a, July thla
aṭanga media organisation kharsak hi 160 chuang an tling tawh a ni. Sorkar beih a nih hnu hian journalist 99 man an ni tawh a, chanchinbu eng emaw zat titawp sak an nih vangin journalist sang chuang zetin an hna an chan tawh bawk.

Sorkar beih anih avanga July 20-a emergency puan chu sorkar chuan pawt seiin, nakkum January thla thleng puan chhunzawm a ni dawn a ni. Emergency law hnuai≠ah hian President Recep Tayyip Erdogan leh cabinet member-te chu thuneihna sang zawk pek an ni.