Khawvel Lawrkhawm
Clinton-i'n point khat chauhin hma hruai tawh
US President thlanna neih turah candidate pahnihte ngawrh takin an campaign chhunzawm zel a, mipuite ngaihdan lak hnuhnung bera an inthlauhna pawh a tlem sawt hle.
ABC News/Washington Post-in mipui ngaihdan a lak hnuhnung ber, Pathianni-a a tihchhuahah chuan Democratic president candidate, Hillary Clinton-i chuan a khingpui, Republic president candidate Donald Trump-a lakah point khat chauhin hma a hruai tawh. President atana Clinton-i duhtu hi 46% niin, Trump-a duhtu chu 45% an ni.
Candidate pahnihten presidential debate an neih hlim khan Clinton-i hian hma a hruai fal hle a, mahse US Secretary of State a nih laia official thila a private email a hman chungchang chu vawrh lar a nih chhoh leh avang leh, a thiltih hian US himna lam thlenga nghawng nei thei nia beih a tawh chhoh avangin, hei hian nghawng a nei lian hle nia ngaih a ni.
Nepal-in Mt Everest-a dil pakhat tikang
Nepal sipaite chuan Mt Everest-a glacial lake hlauhawm tak pakhat chu an tih kang thu an sawi.
Dil an tih kang hi Imja glacial lake a ni a, feet 16,400-a sanga awm a ni. Sipaite chuan he dil aṭanga tui luangchhuak hi tlang lawnte inkhuarna hmun te, tlang lawnna kawng leh lei tan a hlauhawm thei tih sawiin, an ti kang ta niin an sawi.
Himalaya tlangah hian glacial lake hi sang tel a awm a, boruak lum zel avanga vur a tui chak avangin heng dilte hi a khat chak hle. Hei vang hian sipaite chuan tlang lawnte himna turin dil awm zinga hlauhawm zualte tih kang chu a him ber niin an sawi. Lake Imja tih kang hna hi sipai leh Sherpa-te chuan thla ruk chhung an thawk a ni. UN chuan dil-a tui awm paihchhuahna tur hian dollar maktaduai thum dawn a pe bawk.
El Salavador President hlui man
El Savador President hlui, Elias Antonio Saca chu sum tam tak tichingpenah puhin man a ni. A rual hian President a nih laia sorkar official paruk pawh man tel an ni bawk.
Kum 50-a upa, Saca hi kum 2004-2009 chhung khan El Savador president a ni a, kum 16 kalta chhunga El Savador president hlui pathum, eiruk chungchanga chhui mek zinga mi a ni. Saca-a thlaktu, Mauricio Funes pawh dik lo taka sorkar fund pawtpeng a, a bank account-a dahah puh a ni a, chhui mek a ni. Police-te chuan Saca hian thuneihna a chan laia a sum lakluh, dollar maktaduai 6.5 aṭanga dollar maktaduai 5 chu khawi aṭanga a neih nge tih a sawichiang lo niin an sawi. President a nih tirha a hausakna chu dollar maktaduai 3.6 a ni a, kum nga hnuah a hausakna hi dollar maktaduai 13.1 zetah a pung hman a ni.