Pakistan-ah Nawrh huaihawt tum mi 1,500 man

Pakistan-a eptu pawl, Imran Khan-a party Pakistan Tehreek-e-Insaf (PTI) in Prime Minister Nawaz Sharif-a bang tura phuta nawrh huaihawt an tum avangin party member 1,500 chu police-te'n an man.

PTI hian vawiin hian Islamabad-ah PM duh lohna lantira nawrh huaihawt hi an tum a, mahse sorkar chuan Islamabad khawpui chhungah thla thum chhung atan kawngzawh huaihawt a lo khap tawh a ni.

Police-te chuan nawrh huaihawt tumte lo dang tur hian Thawhṭanni zan khan PTI member dapchhuah hna thawkin, mi 1,500 an man a ni. Kar kalta tawp lam khan Imran Khan-a thlawptute leh Riot police-te chu an lo intibuai tawh a, police-te hian eptu member-te hnawhdarh nan hian tear gas an hmang a ni. Pathianni khan Khan-a chenna bul leh Islamabad khawdaiah buaina a chhuak bawk.

Thawhṭanni khan Pakistan court chuan Khan-a zuitute chu Islamabad kawtthlerah kawngzawh a khap sak a, an punkhawm duh pawhin city party huamchhunga chauh an awm a remti a ni. Khan-a attorney, Babar Awam chuan court thupek hi ngaihtuah ṭha tura an ngen tur thu a sawi.

Imran Khan chuan PM Sharif-a chu Panama Paper leak-ah a hming chuangin, ram pawn lamah sum tam tak a chheprelh niin a puh a, eiruknaa inhnamhnawihah puhin bang turin a phut a ni.

Kumin April thlaa Panama-a Mossack Fonseca law firm document putchhuakah khan Sharif-a fanu leh a fapate pahnih chuan British Virgin Island-ah company an nei nia tarlan a ni. Mahse Sharif-a te chhung chuan tih dik loh an neih loh thu an sawi thung. Pakistan danah chuan rampawn lama company neih chu dan kalh a ni lo a, mahse Khan chuan company neihna tur hian sorkar sum an eiru niin a puh.