Lebanon President atan Aoun thlang

Lebanon Parliament chuan thla 29 zet president nei loa an awm hnuah army commander hlui Michel Aoun chu president atan a thlang.

Politics buaina avangin Lebanon hi kum hnih chuang zet President nei loin a awm a ni. Thawhṭanni-a Parliament-a vote laknaah MP 83 chuan Aoun hi an thlawp a, president ni tur hian member 65 thlawpna neih phak a ngai a ni. Result hi ram mipuite hriat theih turin TV-ah chhiar chhuah a ni. MP-te hian an ram hotu lu ber tur hi ṭum 46 zet vote an thlak hnuah an thlang chhuak thei ta a ni.

Lebanon President atana thlan, kum 81 mi Anoun hi Maronite Kristian a ni a, an ram chu Syria tualchhung buaina theng mekin a nghawng buai ve lohna tura venhim a tiam.

UN Secretary General Ban Ki-moon chuan president atana Anoun thlan a ni ta chu lawmawm a tih thu sawiin, Lebanon-a paty hrang hrangte chu an ram tana lungrual taka an thawh ho a beisei thu a sawi. US State Department chuan Anoun chu a lawmpui thu sawiin, party-te chuan lungrual taka an pawm tlan vek a beisei thu a sawi bawk.