Lirnghing tuartu mi 15,000 chuang center leh hotel-ah awm mek

Central Italy-a lirnghing vangin mi 15,000 chuang chu chenna nei loin hotel leh sorkarin an awmna tur lailawk a siamah an la khawsa mek.

Pathianni khan magnitude 6.6-a nain central Italy-ah hian lir a nghing a, in tam tak a tluchhia a, mahse thi leh hliam erawh an awm lo. Italy civil protection authority chuan Adriatic Coast leh Lake Trasimeno chhehvela mi 4,500 chuang chu hotel-ah an khawsa mek tih an sawi a, mi 10,000 chuang chu Umbria leh Marche biala emergency centre-ah an awm mek bawk.

Prime Minister Matteo Renzi chuan lirnghingin a thil tihchhiatte hi siamṭhat leh a ni dawn tih a sawi a, a siamṭhat hna thawhna kawngah dik taka hna thawh a nih tur thu a sawi bawk. "Sum engmah a lo thlawna sen a ni dawn lo a, dik tak leh eirukna tel loin hna thawh a ni ang" a ti.

Norcia biala lirnghingin a tihchhiat, kum zabi 13 hunlaia sak, St. Benedict Basilica leh Santa Margia Argentea-te chu enfiah mek an ni. Hmanlai thil hlui pawimawh takte chu a theih anga hum zel an tum thu thuneitute chuan an sawi.