SKorea inrelbawlnaa inhnamhnawiha puh hreng

South Korea President Park Geun-hye-i ṭhianṭha tak, Choi Soon-sil-i chu sorkara nihna pawimawh engmah nei lo chunga an ram inrelbawlna leh policy siam chungchangah inrawlhah puhin hren a ni.

Choi-i hi Thawhṭanni zan aṭang khan emergency detention hnuaiah hren a ni. Prosecutor-te chuan dan ang taka man a nih dawn leh dawn loh chu darkar 48 chhungin an rel ang. Prosecutor-te chuan hren a nih chhan chu sorkar inrelbawlna kawnga a inhnamhnawihna finfiahna te a tichhiat a, ram pawn lama a kal chhuah an hlauhthawn vang a ni tih an sawi.

Thawhṭanni khan Choi-i hian prosecutor-te hmu tura a kal hmaa chanchin thar lakhawmtute a kawmnaah, thi tura hremna pekna tlak pawi a khawih tih sawiin, ngaihdam a dil a ni.

Kar kalta khan President Park-i chuan sorkar document pawimawhte chu Choi-i hi a hmuh thu leh, President a nih anga a thusawi tur
ṭhenkhat pawh a siamṭhat tir thu a lo sawi tawh a, he thil thleng vang hian ram mipuite hnenah pawh ngaihdam a dil a ni. Choi-i leh Park-i hi kum 40 zet ṭhianṭha tak an lo ni tawh a ni.

President thiltih avang hian eptute chuan lungawi lohna lantirin, kar kalta Inrinni khan Seoul-ah kawng an zawh a, President Park-i chu bang turin an phut.