South Sudan-a UN sipai hotu ban

United Nations Secretary General Ban Ki-moon chuan South Sudan-a UN sipaite chu civil mite humhim zo loa puh an nih vangin an commander Lt Gen Johnson Mogoa Kimani Ondieki chu a ban.

South Sudan rama chhawmdawl hna thawkten report an tihchhuahah, kumin July thlaa sorkar sipaiten Juba-a international aid compound an beih khan, UN sipaite chuan civil mite chhan tura lo bei let loin an post-te an kalsan zawk nia sawi a ni. Helho leh sorkar sipaite inbeihnaah hian tualchhunga journalist pakhat a thi a, chhawmdawl hna thawktu ṭhenkhatten pawngsual an tawk bawk.

South Sudan-ah hian President Salv Kirr-a guard leh Vice President aṭanga ban, Riek Marchar-a guard-te intihbuai vangin buaina nasa tak a chhuak zui a ni.

July 8-11 inkara Juba-a inbeihna thleng chungchang hi UN hriatpuiin chhui chian a ni. UN sipaite chet dan report thehluh a nih hnuah Ban Ki-man chuan UN force commander Lt Gen Johnson Mogoa Kimani Ondieki chu a ban tih UN thupuangtu, Stephane Dujarric chuan a sawi.

Juba-a ni thum an inbeih chhung hian mi 73 an thi a, UN hnena himna zawnga tlanlut mi 20 chuang an tel a, UN sipai pahnih an thi bawk. South Sudan sipaite hian UN peackeeping base, UN House tia sawi leh a bula Terrain Camp-te an bei tel a ni. Report chuan hemi ṭuma inbeihna thlengah hian UN Mission hruaitu chuan hruaitu tlak a nih loh zia a lang chiang hle niin a sawi a, UN muanna sipaite chuan mumal taka enkawl an ni lo tih a tarlang.

South Sudan-a UN sipaite hi China, Ethiopia, Nepal leh India aṭanga kal an ni a, mahse UN force hotu hi sipaite thununna kawngah a thawk ṭha tawk lo a, hei vang hian UN hmun beih an nih pawhin muanna sipaiten an lo chhan let dan chu a ṭha tawk lo hle niin an sawi. He thil thlen lai hian South Sudan-ah hian UN muanna sipai 16,000 an awm a ni.