Khawvel Lawrkhawm

Pakistan PM chhui chiang dawn

Pakistan Supreme Court chua an ram Prime Minister Nawaz Sharif leh a chhungte sum tichingpena puh an nih chungchang chhui chiang turin commission din a remti ta.

Panama Paper putru-ah Sharif leh a chhung≠te hian UK-ah company an nei nia tarlan a ni a, hei hi dik lo taka an ram aṭanga sum an hmuh hmanga an neih niin eptute chuan an puh. Mahse Sharif-a chuan an puhna hi thu dik lo niin a sawi thung.

Eptu pawl, Imran Khan-a kaihhruai Pakistan Tehreek-i-Insaf chuan Panama Paper putru-a Sharif leh a chhungte hming a chuan avang hian PM hi eirua puhin bang turin an phut a, Islamabad khawpuiah nawrh huaihawt an tum bawk a ni. Mahse Supreme Court thupek tihchhuah avang hian an nawrh huaihawt tum chu ṭhulhin, hnehna kawngzawh an nei zawk dawn tih an sawi.

Nigeria sipaiten hel kut atangin mi 38 chhanchhuak

Nigeria sipaite chuan hel pawl Boko Haram kut aṭangin mi 38 an chhanchhuak a, an mi chhanchhuahte hi hmeichhia 19 leh naupang 19 an ni.

Sipaite hian an ram hmarchhak lam, Borno state-a Dumba khua-ah helho nen hian inkapin hel paruk an kaphlum a, an mi hren mi 38-te hi an chhanchhuak niin sipai thupuangtu, Sani Usman chuan a sawi.

Boko Haram laka beihpui thlaktute hi Nigerian Army hnuaia 8 Task Force Division an ni a, an operation hi 'Operation Hardknock' tiin an vuah a, Nigeria leh Niger ramri bul, Borno-ah Boko Haram hel dapchhuah hna an thawk mek. Sipaite hian Momo leh Tunshe khuaa helho tawmbuk tam tak an thianfai tawh a ni.

Pope-in hmeichhe puithiam khap chhunzawm zel ring

Roman Catholic kohhran hotu, Pope Francis chuan an kohhan huam chhungah puithiam atana hmeichhia nemngheh an khapna chu an la hman chhunzawm reng a rin thu a sawi.

Kum 1994 khan Pope John Pual chuan puithiam atana hmeichhe nemnghet chung≠chang chu ngaihtuah nawn ngai tawh lo niin a lo sawi tawh. Hei hi sawichhuakin, Pope Francis pawhin an ngaihdan chu ala ngai reng tih a sawi a, Vatican pawhin hei hi Catholic kohhran kalphung, tihdanglam theih loh a nih thu a sawi bawk.