Moscow-Pyongyang inkarah rel service tir leh dawn

Russia leh North Korea chuan an ram khawpui, Moscow leh Pyongyang inkarah khualzin phur rel service tir leh an tum tih Russian Railways (RZD) chuan a sawi.

Moscow-Pyongyang inkarah rel hi a hmain service tir a lo ni tawh a, mahse kum 2020 khan Covid-19 hri leng vangin tih tawp a ni a, tun thlengin service hi tih tawp a ni chhunzawm ta rih a ni. mahse tun hnaiah inremna an siamah, June 17 aṭangin service hi tih thar leh an tum a ni.

Moscow-Pyongyang inkar hi km 10,000 chuanga thui niin, rel hian ni riat an thang a, khawvela direct train route thui ber a ni. Kawng lakah hian Russia khawchhak lama Tumen lui chunga lei, meter 800-a thui an dawh Tumangang Friendship Bridge an zawh a ngai a ni. He lei hi Korea-Russia Friendship Bridge tia sawi a ni bawk. He rel kawng hi ram pahnihten khawmual lama inkalpawhna an neih awmchhun a ni. Rel service chhunzawm leh a nih hunah, thla tin ni 3 leh ni 17-ah Pyongyang aṭangin rel hi a chhuak ang a, Moscow aṭangin ni 12 leh ni 26-ah a tlan chhuak ve thung ang.

Pyongyang leh North Korea ramri bula Russia khawpui pakhat, Khabarovsk inkarah pawh June 19 aṭangin rel service tir tum a ni bawk a, ni hnih an thang thung a ni.