Los Angeles-ah curfew puang

US-a Los Angeles khawpuia dan loa pem lutte dap chhuah hna thawh vanga lungawi lohna lantira nawrh huaihawtten mi rawk leh tharum thawhna an thlen nasat avangin, mayor Karen Bass chuan khawpui lun lai, commercial area-ah curfew a puang.

President Donald Trump kaihhruai sorkar hnuaia Immigration and Customs Enforcement (ICE) office-te chuan kar liam ta aṭang khan Los Angeles khawpuiah hian dan loa pem lutte dap chhuah hna a kalpui ṭan a, mi eng emaw zat an man a ni. Khawpuia cheng mi tam tak chuan sorkar hmalaka hi duh loin immigration officer-te an lo dang a, lungawi lohna an lantir bawk. Hei vang hian President Trump chuan LA khawpuiah hian venhim hna thawk turin National Guard 4,000 leh Marines 700 dawn a lo thawn lut tawh bawk.

Kumin January thlaa President atana lak luh a nih khan Trump chuan an rama dan loa pem lutte dap chhuah leh thawn haw leh, US-Mexico ramri pawh khar a lo tiam tawh a ni.

California state-a Los Angeles khawpui hi US-a khawpui hausa ber zinga mi a ni a, mi mtd 10 dawn an cheng. Hei hi California state puma mihring awm zat aṭanga 27% vel an tling. Khawpuia cheng hmun thuma ṭhena hmun khat hi ram danga piang niin US Census chuan a tarlang. Document nei loa pem lut hi nuai 9 vel an awm bawk.