UK-in Israel minister 2 hrekna siam

United Kingdom (UK) chuan Israel far-right minsiter pahnih, Itamar Ben-Gvir leh Bezalel Smotrich te chu West Bank-a Palestinian mite beihna tur chawkchhuak zawnga mipui fuihah puhin hrekna a siam. An pahnih hian UK-a zin luh a khap bakah, UK-a an thil neihte chu khawih chet theih loha hrek sak an ni ang.

Australia, Norway, Canada leh New Zealand chuan Israel minister-te hrekna hi an lo siam tawh bawk a ni.

UK foreign secretary David Lammy chuan Israel finance minister Smotrich leh national security minister Ben-Gvir te hian tharum thawhna chawk chhuak zawnga mipui an fuih bakah, Palestinian te dikna chanvo an palzut sak a ni, a ti.

Israel chuan mipuiten an aiawh tura an thlan chhuahte laka UK-in hetiang zawnga chet a la hi thil awm lo tak a ni tih a sawi. US secretary of state Marco Rubio pawhin UK chet dan hi demin, hrekna an siam hi US kaihhruaia Gaza Strip-a inkahhai puan, Hamas mi hrente hruai haw leh indona ti tawp tura hmalakna ti chhe thei a nih thu a sawi ve bawk. Hrekna siamtu ramte chu an thutlukna siam tawh sut leh turin a ngen. Israel-a US ambassador, Mike Huckabee pawhin UK thutlukna siam chuan a ṭhawng hle tih sawiin, a dem thu a sawi ve bawk. Israel foregin minister Gideon Saar chuan kar leh hian ram pangate chhan letna tur ngaihtuahin cabinet meeting neih a ni dawn tih a sawi a, an thutlukna hi pawm theih loh hulhual a ni, tiin a sawi.

Smotrich leh Ben-Gvir te hi Gaza indona thleng mek chungchangah sawisel an lo ni fo tawh a, an pahn hian Gaza-a chhawmdawlna thawn luh phalsak duh lotu niin, Palestinian awmte pawh ram danga inbengbel turin an lo ti tawh ṭhin a ni.