Austria school-a inkahna thlengah mi 10 thi

Austria-a Styria province khawpui, Graz khuaah Thawhlehni khan Dreierschützengasse secondary school-ah zirlai hlui pakhatin mi a pawng kah a, mi 10 an thi. Hliam tuar mi 12 an awm bawk. He thil thleng hi Austria chanchina tun hnaia silai hmanga pawikhawihna thleng rapthlak ber a ni.

Pawikhawihtu nia puh hi he school-a kal ṭhin, kum 21 nia sawi a ni a, man nghal a ni. A hming puanzar a ni lo a, a pawikhawihna chhan tak pawh hriat a la ni lo. A pawikhawihna atan hian pistol leh shotgun a hmang nia sawi a ni a, silai license pawh a nei a ni. A kah hlum zinga pasarih hi zirlai an ni a, thite hi hmeichhia pasarih leh mipa pathum a ni tih state media chuan a tarlang.

Austria sorkar chuan pawikhawihna thlenga thite sunna hi ram pumah ni thum chhung hman a ni dawn tih a puang a, nimina an ram huna chawhma dar 10 khan mitthite sunna atan minute khat ngawi rengin an ding bawk. President Alexander Van der Bellen offfice, Vienna-a Hofburg Palace-ah an ram flag chu a ngul chanveah zar a ni. Pawikhawihna thlenna school hi tiam chin awm loin khar a ni zui bawk.